ഞാൻ സ്വപ്നം കണ്ട ജീവിതം
ജീവിച്ചു തീർക്കാനാണെന്റെ മടക്കം
എന്നെയിവിടെ പിടിച്ചു നിർത്താൻ
വാശി കാണിക്കുന്നവരേറെയുണ്ട്
കയ്യിലൊരേണിയിരുന്നിട്ടും തരാതെന്നെ
കുഴിയിൽ നിന്നേറ്റാൻ കൈകാലിട്ടടിക്കുന്നവരും
സ്നേഹിച്ച് സഹായിച്ച് തങ്ങളുടെ
വേഷം കൃത്യമായ് അഭിനയിക്കുന്നവരോടും
നന്ദി പറഞ്ഞു പോകേണ്ടതുണ്ടെനിക്ക്
നഷ്ടമൊന്നുമില്ല, നേട്ടമുണ്ടായിട്ടുണ്ടുതാനും
നഷ്ടപ്രതാപത്തിന്റെ കണക്കുകളിൽ
ഞാൻ പതറി പോകില്ല ,കാരണം
ബാല്യം മുതൽ നാളിതു വരെ
അങ്ങിനെയൊന്നൊനിക്കില്ലായിരുന്നു
തകർന്നൊടിഞ്ഞതെന്റെ വിശ്വാസമാണ്
അല്ല ,അവസാന പ്രതീക്ഷയാണ്
അല്ല , കടമയോ സ്വപ്നമോ ആണ്
ഒരരിശത്തിനു കിണറ്റിൽ ചാടുന്നതല്ല
നിറങ്ങൾ നഷ്ടപെട്ട മഴവില്ല് പോലെ
ജീവിതം വട്ടം കറങ്ങാൻ തുടങ്ങിയിട്ട്
ഭ്രാന്തു പിടിപ്പിക്കാൻ തുടങ്ങിയിട്ട്
സമനില തെറ്റാതെ സംയമം പാലിച്ചത്
വെറുതെയാകുമ്പോഴുള്ള അമർഷമുണ്ട്
കുരുത്തമില്ലായ്മയും കണ്ടകശനിയും
ചാത്തനും ഇപ്പോഴെന്റെ മിത്രങ്ങളാണ്
നിരന്തരം ദ്രോഹിച്ചിട്ടും മറുത്തൊന്നും
പറയാനാവാത്ത അടിമയോടുള്ള വാത്സല്യം
സത്യത്തിന്റെ വഴി അടിമത്വത്തിന്റെതാണ്
ഞാൻ എന്നിലേക്ക്‌ ചുരുങ്ങുന്നു
എന്റെ വഴിയിലേക്ക് മടങ്ങുന്നു
പല്ലിളിയോടെ കാത്തിരിക്കുന്നതെന്റെ
മരണമാണെങ്കിലും നിസ്സംഗതയോടെ
നടന്നു തീർക്കണമെന്റെ ശിഷ്ടജീവിതം
ശിഷ്ടജീവിതം കഷ്ട ജീവിതം,എന്നാൽ
പ്രിഷ്ടം താങ്ങി ജീവിതം ശ്രേഷ്ഠമല്ല ജീവിതം
